ಒಬಾಮಾಯಣ!

ಸ್ನೇಹಿತರೇ,

ಇದೇ ಮೇ 2ರಂದು ಅಮೇರಿಕದ ಸೈನ್ಯದವರು ಒಸಾಮಾನನ್ನು ಕೊಂದ ಸುದ್ದಿ ಇಡೀ ಪ್ರಪಂಚಕ್ಕೆ ಖುಶಿಯನ್ನುಂಟು ಮಾಡಿದೆ. ಅಮೇರಿಕನ್ನರು ಈ ಸಂದರ್ಭದಲ್ಲಿ ಬೀದಿ-ಬೀದಿಗಿಳಿದು ಕುಣಿದು ಕುಪ್ಪಳಿಸಿದರು!

ಈ ಸಂದರ್ಭದಲ್ಲಿ ನನ್ನ ಹಳೆಯ ಕವನ ಒಂದು ನೆನಪಿಗೆ ಬರುತ್ತಿದೆ.. September 2010 ರಲ್ಲಿ World Trade Center ದುರಂತದ ಕುರಿತು ಒಂದು ಕವನ ಬರೆದಿದ್ದೆ. ಅದರಲ್ಲಿ WTCನ ಎರಡು ಕಟ್ಟಡಗಳನ್ನು ಇಬ್ಬರು ಪ್ರೇಮಿಗಳಿಗೆ ಹೋಲಿಸಿ ಒಸಾಮಾನನ್ನು ಅವರಿಬ್ಬರನ್ನೂ ಕೊಂದ Villainಗೆ ಹೋಲಿಸಿದ್ದೆ.. ಕವನ ಅಂತ್ಯದಲ್ಲಿ ಲಾಡೆನನ್ನು ಭೂಮಿಯ ಮೇಲೆ ಎಲ್ಲೇ ಅಡಗಿದ್ದರೂ ಹಿಡಿದು ತಂದು ಆ ಪ್ರೇಮಿಗಳು(ಕಟ್ಟಡಗಳು) ಕೊಲೆಯಾದ ಸ್ಥಳದಲ್ಲೇ ಸಜೀವ ದಹಿಸಿ ಹೂತು ಹಾಕಿ ಎಂಬ ಆಶಯವು ಮೂಡಿತ್ತು. ಇಂದು ಅದು ನಿಜವಾಗಿದೆ! ಲಾಡೆನನ್ನು ಗುಂಡಿನಲ್ಲೆ ಸುಟ್ಟು ಅಮೇರಿಕಕ್ಕೆ ಒಯ್ದು ಸಮುದ್ರದಲ್ಲಿ ಹೂತುಹಾಕಿದ್ದಾರೆ!

ಆ ಕವನದ link ಇಲ್ಲಿದೆ:
http://poemsofpradeep.blogspot.com/2010/09/2001-911-wtc-love-story.html

ಲಾಡೆನ್ ಸತ್ತ ಸುದ್ದಿ ಟಿವಿಗಳಲ್ಲಿ ಪ್ರಸಾರವಾಗುವ ಸಮಯದಲ್ಲಿ ನಾನು ರಾಮಾಯಣ ಪುಸ್ತಕ ಓದುತ್ತಾ ಕುಳಿತಿದ್ದೆ. ಆ ಪುಸ್ತಕದ ವಿಷಯವೂ, ಸುದ್ದಿಯ ವಿಷಯವೂ ಸೇರಿಕೊಂಡು ಈ ಕವನ ಮೂಡಿತು..

ಘೋರ ಯುದ್ಧದಿ ಅಂದು ರಾವಣನ ಕೊಂದಂತೆ ರಾಮ,
ಒಸಾಮಾಸುರನ ಸಂಹರಿಸಿಹನು ಸಾಹಸಿ ಒಬಾಮ;

ಆಗಿಹುದು ಮತ್ತೊಮ್ಮೆ ಲೋಕಕೆ ಕಲ್ಯಾಣ,
ಹಸಿದ ಹೊಟ್ಟೆಗೆ ಹಾಲೆರದಷ್ಟೇ ಹಿತಕರ ಈ ಮರಣ;

ನೆನಪಾಯಿತು ಇಂದು ಆ ಜಯ-ವಿಜಯರ ಮರುಜನ್ಮ,
ಅವರೇ ಈ ಕಲಿಯುಗದ ಒಸಾಮ ಮತ್ತು ಸದ್ದಾಮ?

ತ್ರೇತಾಯುಗದಲ್ಲಿ ಪುಷ್ಪಕ ವಿಮಾನದಲ್ಲಿ ಸೀತಾಪಹರಣ,
ಕಲಿಯುಗವಿನ್ನೂ ಕೀಳು, ಇಲ್ಲಿ ವಿಮಾನದ್ದೇ ಅಪಹರಣ!

ಅಂದು ಅಡ್ಡ ನಿಂತು ಹೋರಾಡಿ, ತೆತ್ತ ಜಟಾಯು ಪ್ರಾಣ,
ಇಲ್ಲಿ ಅಡ್ಡ ನಿಂತ ಕಟ್ಟಡದಲ್ಲಿದ್ದ ಸಾವಿರಾರು ಜನರ ಮರಣ.

ಅಂದು ಸೀತೆಯ ಹುಡುಕಲು ಹಲುಬಿದಂತೆ ರಾಮ, ಹನುಮ,
ಹತ್ತು ವರ್ಷ ಬಿಡದೇ ಹುಡುಕಿದರು ಬುಷ್ ಮತ್ತು ಒಬಾಮ!

ಅಂದು ಹುಡುಕಾಟದಿ ಧ್ವಂಸವಾಯಿತು ಅಶೋಕವನ,
ಇಲ್ಲಿ ಅಮೇರಿಕನ್ನರು ಬೂದಿಯಾಗಿಸಿದರು ಇರಾಕಿನ ಮಣ್ಣ,

ಅಂದು ಸುಗ್ರೀವ ಸಖ್ಯವಾಗಿ ವೀರಮರಣ ಪಡೆದ ಶೂರ ವಾಲಿ,
ಇಲ್ಲಿ ಯೂರೋಪಿಯನ್ನರ ಸಖ್ಯದ ದಾಳಿಗೆ ಇರಾಕಿನ ಹುಸೇನ ಬಲಿ.

ಬಂದನಂದು ರಾಮ ರಣಭೂಮಿಗೆ, ಏರಿ ಇಂದ್ರನ ರಥ,
ಬಂದಿತಿಲ್ಲಿ ಒಬಾಮಾ ಪಡೆ ಪಾಕಿಸ್ತಾನಕೆ, ಹಿಡಿದು ವಾಯುಪಥ,
ಪರಿಣಾಮ ಒಸಾಮ ಹತ, ಲೋಕಕ್ಕೆ ಹಿತ.

ಅಗ್ನಿದೇವನು ಬಂದಳಿಸಿದನಂದು ಸೀತೆಯ ಮೇಲಿನ ಶಂಕೆ,
ಲೋಕವೇ ಒಪ್ಪಿಹುದಿಂದು, ಪಾಕಿಸ್ತಾನದ ಬುದ್ಧಿ ಕೊಂಕೇ,
ಎಷ್ಟೋ ಜಗತ್ಕಿರಾತಕರಿಗಿನ್ನೂ ಅದು ಉಗ್ರರ ವೈಭವದ ಲಂಕೆ!

ಹಿಂಸೆ ಅಳಿವುದು, ಶಾಂತಿ ಉಳಿವುದು ಕೊನೆಗೆ,
ನೆನೆಯಿರಿ ಭಗವಂತನಂದು ಹೇಳಿದುದ ನಮಗೆ,
"ಧರ್ಮಸಂಸ್ಥಾಪನಾರ್ಥಯಾ ಸಂಭವಾಮಿ ಯುಗೇ ಯುಗೇ"

|| ಶ್ರೀ ಒಬಾಮಾಯಣ ಸಂಪೂರ್ಣಂ ||