Thursday, May 14, 2015

ಮದುವೆ - ಮನೆ


ಮದುವೆ - ಮನೆ

ಅರಳು ಮರಳೇನೋ ಅರವತ್ತಕ್ಕಂತೆ
ಮೂವತ್ತರ ನನಗೇಕೆ ಈ ಅದಲು-ಬದಲು?
ಎರಡು ದೋಣಿಯ ನಡುವೆ ನಿಂತಂತೆ
ಮದುವೆ ಸಮಯಕ್ಕೇ ಮನೆ ಕಟ್ಟುವ ಗೋಜಲು

ಜಾತಕದ ಕುಂಡಲಿಯ ಚಚ್ಚೌಕ ರೇಖೆಗಳಲಿ
ಕಾಣುವುದು ಗೃಹ ನಿರ್ಮಾಣದ ನೀಲಿ ನಕ್ಷೆ!
ಅಚ್ಚುಕಟ್ಟಾಗಿ ಅಚ್ಚಾದ ಆಮಂತ್ರಣ ಪತ್ರಿಕೆಯಲೂ
ಹತ್ತಂಕದ ಪ್ರಶ್ನೆಗಳು! ಸನಿಹವಿದೆ ಎಂ.ಬಿ.ಎ. ಪರೀಕ್ಷೆ

ಮನೆಯೆದುರು ಇದೇನು ಚಪ್ಪರವೋ ಸೆಂಟ್ರಿಂಗೋ?
ತಳಿರು ತೋರಣದ ಬದಲು ಕಂಡಿತು ಬರಿ ಲಿಂಟೆಲ್ಲು
ವರ ಪೂಜೆಗೂ ತಂದಿಟ್ಟಂತಿದೆ ಹಾರೆ ಗುದ್ದಲಿ ಪಿಕಾಸಿ!
ಕರಣೆಯೇ ಕೈಗಿಟ್ಟಂತಿದೆ ಹೋಮಕೆ ತುಪ್ಪ ಸುರಿಯಲು!

ಸಪ್ತಪದಿಯ ಹೆಜ್ಜೆಗಳ ನಾನಿಡಲಿ ಎಲ್ಲಿ?
ಎಲ್ಲಿ ನೋಡಿದರಲ್ಲಿ ಇಟ್ಟಿಗೆ ಮರುಳ ರಾಶಿ!
ಉಪಹಾರದೆಲೆಗಳಲಿ ಹಬೆಯಾಡುತಿದೆ ಕಾಂಕ್ರೀಟು!
ಕ್ಯೂರಿಂಗಿನ ಕೆಲಸವಿದೆ ನಾ ಹೋಗಲಾಗುವುದಿಲ್ಲ ಕಾಶಿ

ಮನೆತುಂಬಿಸಿಕೊಂಡಾಗ ಒದ್ದು ಚೆಲ್ಲಿದರಕ್ಕಿಯ
ನಾ ರೇಗಿದೆ "ಮೆಲ್ಲಗೆ ಕಣೇ ಹೊಸದಿದು ಗ್ರಾನೈಟು"
"ಸರಿ ಮಲಗಿರಿ ಹಾಗಿದ್ದರೆ ಅದರ ಮೇಲೆಯೇ"
ಹೇಳಿ ಒಳ ಹೋದಳು ನನಗೆ ಗುಡ್‍ನೈಟು!
-------------------------------------------------------

"ಮನೆ ಕಟ್ಟಿ ನೋಡು, ಮದುವೆ ಮಾಡಿ ನೋಡು" ಎಂದು ಹಿರಿಯರು ಹೇಳುವ ಮಾತು ಶತ ಪ್ರತಿ ಶತ ಸತ್ಯ. ಮದುವೆ ಮಾಡುವುದು ಮತ್ತು ಮನೆ ಕಟ್ಟುವುದು ಎರಡೂ ಜೀವನದಲ್ಲಿ ಅಪಾರವಾದ ಅನುಭವವನ್ನು ತಂದುಕೊಡುವಂತಹ ವಿಷಯಗಳು. ಜೀವನವೇ ಒಂದು ಅಗ್ನಿಪರೀಕ್ಷೆಯಾದರೆ ಮನೆ ಕಟ್ಟುವುದು, ಮದುವೆ ಮಾಡುವುದು ಎರಡೂ ಆ ಪರೀಕ್ಷೆಯ ಫಲಿತಾಂಶಗಳಿದ್ದಂತೆ! ಪರೀಕ್ಷೆಯ ತಯಾರಿಯಲ್ಲಿ ಶ್ರಮವಹಿಸಿದವರ ಫಲಿತಾಂಶಗಳು ಉತ್ತಮವಾಗಿರುತ್ತವೆ. ನಾನಂತೂ ಹಿಂದೆಂದಿನಂತೆ ಪರೀಕ್ಷೆಯ ಸಮಯದಲ್ಲಿ ಎಡವಟ್ಟುಗಳು ಮಾಡಿಕೊಂಡು ಅರೆಬರೆ ತಯಾರಿಯಲ್ಲಿ ಪರೀಕ್ಷೆ ಬರೆದಿದ್ದೇನೆ... ಫಲಿತಾಂಶ ನೋಡಲು ನೀವೆಲ್ಲ ಬರಲೇಬೇಕು...

ಮತ್ತೇನಿಲ್ಲ ಇದೇ ಮೇ ತಿಂಗಳ 22ನೇ ತಾರೀಖು ನಾನು ವೈವಾಹಿಕ ಜೀವನಕ್ಕೆ ಕಾಲಿಡುತ್ತಿದ್ದೇನೆ. ನೀವೆಲ್ಲ ತಪ್ಪದೇ ಬಂದು ಹಾರೈಸಬೇಕು, ಆಶೀರ್ವದಿಸಬೇಕು.

ಮುಹೂರ್ತ:
22nd May 2015 
9:55 AM to 10:30 AM

ಆರತಕ್ಷತೆ:
22nd May 2015
6:30 PM onwards

ಸ್ಥಳ:

Chamaraju Kalyana Mantapa
#102/5, 16th Cross, 7th 'A' Main, 
Jayanagar 3rd Block, 
Near South-end circle, Bangalore-560011
 


Sunday, April 12, 2015

ಕಂಟ್ರೋಲ್ - ಸಿ






ಅದು ನಾನು ದಾವಣಗೆರೆಯಿಂದ ಹೊಸದಾಗಿ ಪದವಿ ಶಿಕ್ಷಣಕ್ಕಾಗಿ ಬೆಂಗಳೂರಿಗೆ ಬಂದಿದ್ದ ಸಮಯ. ಆಗಿನ್ನೂ ಸಿಟಿ ವಾತಾವರಣ ನನಗೆ ಹೊಸದು. ಇಲ್ಲಿನ ವಿದ್ಯಾರ್ಥಿಗಳ ಸ್ಟೈಲಿಶ್ ಜೀವನ ಶೈಲಿ ನೋಡಿ ಬೆರಗಾಗಿದ್ದೆ! ನಮ್ಮೂರಲ್ಲಿ ಅಪರೂಪಕ್ಕೆ ಇನ್-ಶರ್ಟ್ ಮಾಡಿದರೆ ಹುಡುಗರು ಕೇಳುತ್ತಿದ್ದರು. ಹುಡುಗಿ ಜೀನ್ಸ್ ತೊಟ್ಟು ಬಂದರೆ ಕಾಲೇಜಿಗೆಲ್ಲಾ ಅವಳ ಹೆಸರು ಗೊತ್ತಾಗುತ್ತಿತ್ತು! ಮೊಬೈಲ್ ಯಾರೂ ಕಂಡಿರಲಿಲ್ಲ. ವಿದ್ಯಾರ್ಥಿಗಳೆಲ್ಲರೂ ಸೈಕಲ್ಲು, ಬಸ್ಸು ಇಲ್ಲವೇ ಕಾಲ್ನಡಿಗೆಯಲ್ಲಿ ಸಂಚರಿಸುತ್ತಿದ್ದರು. ರಸ್ತೆಗಳು ವಾಹನ ದಟ್ಟಣೆ ಇಲ್ಲದೇ ಪ್ರಶಾಂತವಾಗಿದ್ದವು. ಹುಡುಗ ಹುಡುಗಿಯರು ಬೆರೆತು ಓಡಾಡುವುದು ಅಪರೂಪ. ಯಾರಾದರೂ ಧೈರ್ಯ ಮಾಡಿ ಹೋಟೆಲ್ಲಿಗೋ ಸಿನಿಮಾಗೋ ಜೊತೆಯಾಗಿ ಹೋದರೆ ಊರಿಗೆಲ್ಲಾ ಗಾಳಿ ಸುದ್ದಿ ಹಬ್ಬುತಿತ್ತು. ಆದರೆ ಇದು ಬೆಂಗಳೂರು ಮಹಾನಗರ. ಇಲ್ಲಿ ಹಾಗಿರಲಿಲ್ಲ. ಹುಡುಗ ಹುಡುಗಿಯರ ವಸ್ತ್ರದಲ್ಲಿ ವ್ಯತ್ಯಾಸವೇ ಕಾಣದು. ಎಲ್ಲರೂ ರಂಗು ರಂಗಿನ ಟಿ-ಶರ್ಟು, ಜೀನ್ಸು ಧರಿಸಿ ಕೈಗೊಂದು, ಕಾಲಿಗೊಂದು, ಕಿವಿಗೊಂದು, ಬ್ಯಾಂಡು, ಬಳೆ, ಓಲೆ ಟ್ಯಾಟೂ ಹೀಗೆ ಇನ್ನೂ ಹತ್ತು ಹಲವು ಚಿತ್ರ ವಿಚಿತ್ರ ಶೃಂಗಾರ ಮಾಡಿಕೊಂಡು ಬರುತ್ತಿದ್ದರು. ಕಾಲೇಜಿನ ಆವರಣದ ಒಳಗೂ ಹೊರಗೂ ಹುಡುಗ ಹುಡುಗಿಯರು ಒಬ್ಬರ ಮೇಲೊಬ್ಬರು ಕೈ ಹಾಕಿಕೊಂಡು ಮಗಾ ಮಚ್ಚಾ ಎಂದು ಮಾತು ಮಾತಿಗೂ ಅರೆ ಕನ್ನಡ ಅಡ್ಡ ಹೆಸರುಗಳನ್ನು ಕೂಗುತ್ತಾ ತರಲೆ ಮಾಡಿಕೊಂಡು ಓಡಾಡುತ್ತಿದ್ದರು. ತರಗತಿಯ ಒಂದು ಮೂಲೆಯಿಂದ ಮತ್ತೊಂದು ಮೂಲೆಗೆ SMSಗಳು ರವಾನೆಯಾಗುತ್ತಿದ್ದವು. ನನಗಂತೂ ಹೊಸದರಲ್ಲಿ ಕ್ಯಾಂಪಸ್ಸಿಗೆ ಕಾಲಿಟ್ಟ ಕ್ಷಣ ಯಾವುದೋ ಬೇರೆ ಗ್ರಹಕ್ಕೆ ಬಂದಂತೆನಿಸುತ್ತಿತ್ತು!
           ನನಗೆ ಆ ದಿನಗಳಲ್ಲಿ ಸಾಹಿತ್ಯ, ಚಿತ್ರಕಲೆಗಳಲ್ಲಿ ತುಂಬ ಆಸಕ್ತಿಯಿತ್ತು. ಆದರೆ ಮನೆಯವರ ಒತ್ತಡದಿಂದ ತಂತ್ರಙ್ಞಾನವನ್ನೇ ಓದಬೇಕಾಯ್ತು. ಬೇರೆ ದಾರಿಯಿಲ್ಲದೆ ಪರಮ ಶತ್ರುವಾದ  ಗಣಿತಕ್ಕೆ ಮತ್ತೆ ಶರಣಾಗಬೇಕಾಯ್ತು. ಜೊತೆಗೆ ಕಂಪ್ಯೂಟರ್ ಸೈನ್ಸ್ ಹಾಗು ಎಲೆಕ್ಟ್ರಾನಿಕ್ಸ್ ಎಂಬ ಭೂತಗಳೂ ಬೆನ್ನು ಹತ್ತಿದವು! ನನಗಿನ್ನೂ ಆಗ ಕಂಪ್ಯೂಟರಿನ ಅ ಆ ಇ ಈ ತಿಳಿದಿರಲಿಲ್ಲ. ಗಣಕಯಂತ್ರವನ್ನು ಆನ್ ಮಾಡಲೂ ಬರುತ್ತಿರಲಿಲ್ಲ. ಯಾರಾದರೂ ಆನ್ ಮಾಡಿ  M S Word  ತೆರೆದಿಟ್ಟರೆ, ಅಮ್ಮ ಸಾವಕಾಶವಾಗಿ ಕುಳಿತು ಅಕ್ಕಿ ಆರಿಸಿದಂತೆ ನಿಧಾನವಾಗಿ ಕೀ ಬೋರ್ಡಿನ ಮೇಲೆ ಒಂದೊಂದೇ ಅಕ್ಷರಗಳನ್ನು ಹುಡುಕಿ ಟೈಪಿಸುತ್ತಿದ್ದೆ. ಆದರೆ ಇಲ್ಲಿ ಹುಡುಗರು ಹಾಗಿರಲಿಲ್ಲ. ಬಹಳ ವರ್ಷಗಳಿಂದ ಮನೆಯಲ್ಲಿ ಕಂಪ್ಯೂಟರ್ ಬಳಸಿ ಪರಿಣಿತರಾಗಿದ್ದರು. ನಿತ್ಯ ಇಂಟರ್ನೆಟ್ ಪಾರ್ಲರ್ಗಳಿಗೆ ಭೇಟಿ ನೀಡಿ ಬೇಕಿದ್ದು ಬೇಡದ್ದು ಎಲ್ಲಾ ಕಲಿತಿದ್ದರು! ಬೆಂಗಳೂರಿಗರಿಗೆ ಸುತ್ತಮುತ್ತಲ ರಾಜ್ಯಗಳ ಐದು ಭಾಷೆಗಳು ಬರುತ್ತವೆ ಎಂದು ಕೇಳಿದ್ದೆ ಆದರೆ ತಂತ್ರಙ್ಞಾನದ ವಿದ್ಯಾರ್ಥಿಗಳಿಗೆ ಅವೆಲ್ಲದರ ಜೊತೆಗೆ ಮತ್ತೊಂದು ಭಾಷೆ ಖಡ್ದಾಯವೆಂದು ತಿಳಿದಿರಲಿಲ್ಲ. ಅದೇ ಈ ಕಂಪ್ಯೂಟರ್ ಭಾಷೆ - "ಸಿ". ಸಂಸ್ಕೃತದಂತೆ ಸಿ ಕೂಡ ಪಂಡಿತರ ಭಾಷೆಯೇ ಸರಿ ಅದಕ್ಕೆ ಹರಸಾಹಸ ಮಾಡಿದರೂ ನನ್ನ ತಲೆಗಂತೂ ಅದು ಹತ್ತಲೇ ಇಲ್ಲ! ಸಿ ಬರಲಿಲ್ಲ ಬದಲಿಗೆ ಅದನ್ನು ನೆನೆದರೆ ಸಿಟ್ಟು ಬರುತಿತ್ತು! ನಮ್ಮ ಸಿ ಅಧ್ಯಾಪಕಿ ಸವಾಲೆಸೆಯುತ್ತಿದ್ದರು. "ತಮಿಳು ತೆಲುಗು ಎಷ್ಟು ಸುಲಭವಾಗಿ ಕಲಿಯುತ್ತೀರಿ. ಅಷ್ಟೇ ಆಸಕ್ತಿಯಲ್ಲಿ ಸಿ ಭಾಷೆ ಕಲಿಯಲು ಏನು ಧಾಡಿ ನಿಮಗೆ?" ನನ್ನ ಬಳಿ ಸೇರಿಗೆ ಸವಾ ಸೇರು ಉತ್ತರವಿತ್ತು... "ತಮಿಳು ತೆಲುಗಿನಂತೆ ಮಹೇಶ್ ಬಾಬು, ರಜನಿ ಕಾಂತ್ ಅಂಥ ಮೆಗಾಸ್ಟಾರ್‌ಗಳು ನಿಮ್ಮ ಸಿ ಭಾಷೆಯಲ್ಲಿದ್ದಾರೆ? ತ್ರಿಶಾ, ಜೆನೆಲಿಯ, ಅನುಷ್ಕಾರಂಥ ಸುಂದರ ನಟಿಯರು ನಿಮ್ಮ ಸಿ ಭಾಷೆಯಲ್ಲಿದ್ದಾರೆ? ಹೋಗಲಿ ಒಂದೆರಡು ಐಟಮ್ ಸಾಂಗ್ ಆದರೂ ಸಿ ಭಾಷೆಯಲ್ಲಿದ್ದಿದ್ದರೆ ನಾವೆ ನಿದ್ದೆಗೆಟ್ಟು ಕಣ್ಣಿಗೆ ಎಣ್ಣೆ ಬಿಟ್ಕೊಂಡು ರಾತ್ರಿಯೆಲ್ಲಾ ಕುಳಿತು ಕಲಿತ್ತಿರಲಿಲ್ಲವೇ?" ಇದನ್ನು ಕೇಳಿದ್ದರೆ ನಮ್ಮ ಮೇಡಮ್ ಬಹುಷಃ ಮೂರ್ಛೆ ಹೋಗುತ್ತಿದ್ದರೇನೋ!

        ವರ್ಷದ ಮೊದಲನೆಯ ಕಂಪ್ಯೂಟರ್ ಲ್ಯಾಬ್ ತರಗತಿಗಳು ಶುರುವಾಗಿದ್ದವು. ನನಗೆ ಅಲ್ಲಿಯ ವರೆಗಿನ ಯಾವುದೇ ಪಾಠಗಳೂ ಅರ್ಥವಾಗಿರಲಿಲ್ಲ. ಆಗಲೇ ಕಂಪ್ಯೂಟರ್ ಎದುರು ತಂದು ಕೂಡಿಸಿಬಿಟ್ಟಿದ್ದರು. ಅದೃಷ್ಟವಶಾತ್ ನನ್ನ ಎದುರಿದ್ದ ಕಂಪ್ಯೂಟರನ್ನು ಯಾರೋ ಪುಣ್ಯಾತ್ಮರು ಬಳಸಿ ಒಂದು ಸಿ ಪ್ರೋಗ್ರಾಮ್ ತೆಗೆದಿಟ್ಟು ಹೋಗಿದ್ದಾರೆ. ನಾನು ಅದರೆದುರು ಕುಳಿತು ಮಿಕ ಮಿಕ ನೋಡುತ್ತಿದೇನೆ! ತರಗತಿಗೆ ಅಧ್ಯಾಪಕಿ ಆಗಮನವಾಯಿತು. ಅವರು ಎಲ್ಲರಿಗೂ ಪ್ರೋಗ್ರಾಮ್ ಬರೆಯಲು ಒಂದು ಪ್ರಶ್ನೆ ಕೊಟ್ಟರು" write a C program to implement a data structure" ನಾನಂತೂ ಆ ಘಳಿಗೆ ಬೋನಿಗೆ ಬಿದ್ದ ಇಲಿಯಂತಾಗಿದ್ದೆ! ಟಿ.ವಿ. ಪ್ರೋಗ್ರಾಮು, ರೇಡಿಯೋ ಪ್ರೋಗ್ರಾಮು ಬಿಟ್ಟರೆ ನನಗೆ ಬೇರ‍್ಯಾವ ಪ್ರೋಗ್ರಾಮ್ ಬಗ್ಗೆಯೂ ತಿಳಿದಿರಲಿಲ್ಲ ಕೆಲವು ಒಳ್ಳೊಳ್ಳೆ structureಗಳನ್ನು ನೋಡಿದ್ದೆ ಆದರೆ ಅದ್ಯಾವುದರ ಬಗ್ಗೆ ಯೂ ಇಲ್ಲಿ ಬರೆಯುವ ಹಾಗಿಲ್ಲ! ಬಹಳ ಕಸಿವಿಸಿಯಾಗತೊಡಗಿತು. ನನ್ನ ಅಕ್ಕಪಕ್ಕದ ಮೇಧಾವಿಗಳು ಪೇಪರಿನ ಮೇಲೆ ಆಗಲೇ ಏನೇನೋ ಗೀಚಿ ಆಗಲೇ ಕಂಪ್ಯೂಟರಿನಲ್ಲಿ ಅದನ್ನು ಟೈಪಿಸಲು ಶುರು ಮಾಡಿದ್ದರು. ಕುತೂಹಲದಿಂದ ಒಮ್ಮೆ ಅವರ ಕಂಪ್ಯೂಟರ್ ಪರದೆಯನ್ನೊಮ್ಮೆ ಬಗ್ಗಿ ನೋಡಿದೆ. ಅವರು ಕಳ್ಳನನ್ನು ಕಂಡಂತೆ ನನ್ನತ್ತ ಕೆಂಗಣ್ಣು ಬೀರಿದರು. ಬೇರೆ ಮಾರ್ಗವಿಲ್ಲದೇ ಸುಮ್ಮನೆ ಹಾಳೆಯ ಮೇಲೆ ಏನೋ ಗೀಚುತ್ತಾ ಕುಳಿತೆ. ನಾನು ಗೀಚಿದ ಗೆರೆಗಳಲ್ಲಿ ನನ್ನ ಹಾಗೆಯೇ ಕನಸು ಕಾಣುತ್ತಾ ಕುಳಿತ ಹುಡುಗನೊಬ್ಬನ ಚಿತ್ರ ಮೂಡುತ್ತಿತ್ತು.
         ಅಷ್ಟರಲ್ಲಿ ಹಿಂದಿನಿಂದ ಬಳೆ ಗೆಜ್ಜೆಗಳ ಸದ್ದು ಕೇಳಿಸತೊಡಗಿತು. ಓರೆಗಣ್ಣಿನಿಂದ ಒಮ್ಮೆ ಕಣ್ಣಾಡಿಸಿ ನೋಡಿದೆ. ನಮ್ಮ ಕ್ಲಾಸಿನ ಹುಡುಗಿಯರ ದಂಡು ಆಗಷ್ಟೆ ಒಳ ಬಂದು ನನ್ನ ಹಿಂದಿನ ಸಾಲಿನಲ್ಲಿ ಕುಳಿತುಬಿಟ್ಟರು. ನನಗಂತೂ ಆಗ "ಅತ್ತ ಪುಲಿ ಇತ್ತ ದರಿ" ಎಂಬ ಪರಿಸ್ಥಿತಿ! ಹೀಗೆ ಅಬ್ಬೆಪರಿಯಂತೆ ಕುಳಿತರೆ ಮಾನ ಹೋಗುವುದು ಖಂಡಿತ. ನನಗೇನೂ ಬರುವುದಿಲ್ಲ ಎಂಬ ಸತ್ಯ ಅವರಿಗೆ ಗೊತ್ತಾಗದಂತೆ ಏನಾದರೂ ಮಾಡಬೇಕೆಂದು ಯೋಚಿಸಿ ನನ್ನ ದುರ್ದೈವವ ಬೈದುಕೊಳ್ಳುತ್ತಾ ಹಾಗೇ ಸುಮ್ಮನೆ ಇತರರಂತೆ ಪ್ರೋಗ್ರಾಮ್ ಟೈಪಿಸುವ ನಟನೆ ಮಾಡಲು ಶುರು ಮಾಡಿದೆ. ಕೀಬೋರ್ಡಿನ ಸಿಕ್ಕ ಸಿಕ್ಕ ಕೀಗಳ ಮೇಲೆ ಬೆರಳಾಡಿಸಿದೆ. ಸುಮ್ಮನೆ ತಲೆ ತಗ್ಗಿಸಿ ಒಂದೇ ಸಮನೇ ಪಟ ಪಟ ಪಟ... ಕಟ ಕಟ ಕಟ... ಎಂದು ಸದ್ದು ಕೇಳುವಂತೆ ಕೀಬೋರ್ಡಿನ ಮೇಲೆ ಬಡಿಯುತ್ತಲೇ ಇದ್ದೆ. ಯಾವ ಯಾವ ಗುಂಡಿಗಳು ನನ್ನ ಬೆರಳುಗಳ ರುದ್ರ ತಾಂಡವಕ್ಕೆ ಸಿಕ್ಕಿ ಅದೆಷ್ಟು ಬಾರಿ ಅಪ್ಪಚ್ಚಿಯಾದವೋ ಗೊತ್ತಿಲ್ಲ. ಒಂದಿಪ್ಪತ್ತು ನಿಮಿಷ ಹಾಗೇ ಸಾಗಿಹಾಕಿದೆ ತಗ್ಗಿದ ತಲೆ ಮಾತ್ರ ಎತ್ತುವ ಧೈರ್ಯ ಮಾಡಲಿಲ್ಲ.
         ಸ್ವಲ್ಪ ಸಮಯದ ನಂತರ ಯಾಕೋ ಹಿಂದಿನ ಸಾಲಿನಿಂದ ಹುಡುಗಿಯರು ಮುಸಿ ಮುಸಿ ನಗುತ್ತಿರುವ ಸದ್ದು ಕೇಳಿ ಬರ ತೊಡಗಿತು. ಏನಿರಬಹುದು ಎಂದು ತಲೆ ಎತ್ತಿ ನೋಡಿದೆ. ನನ್ನ ಪ್ರಯತ್ನವೆಲ್ಲಾ ವ್ಯರ್ಥವಾಗಿತ್ತು! ನಾನು ರೆಡ್-ಹ್ಯಾಂಡ್ ಆಗಿ ಸಿಕ್ಕಿಬಿದ್ದಿದ್ದೆ! ನನ್ನ ಬೆರಳುಗಳ ಅತ್ಯಾಚಾರ ತಡೆಯಲಾಗದೆ ನನ್ನ ಕಂಪ್ಯೂಟರ್ ಹ್ಯಾಂಗ್ ಆಗಿತ್ತು. ಪ್ರಳಯಕಾಲದಲ್ಲಿ ಪ್ರಾಣಿಗಳು ಎಡ್ಡಾದಿಡ್ದಿ ಓಡುವಂತೆ ನನ್ನ ಪರದೆಯ ಮೇಲೆ ಚಿತ್ರ ವಿಚಿತ್ರ ಅಕ್ಷರ, ಸಂಖ್ಯೆ, ಸಂಕೇತಗಳು ಮೇಲಿಂದ ಕೆಳಗೆ ಕೆಳಗಿಂದ ಮೇಲೆ ಚೆಲ್ಲಾಪಿಲ್ಲಿಯಾಗಿ ಓಡುತ್ತಿದ್ದವು! 
 
ಏನು ಮಾಡಬೇಕೆಂದು ತಿಳಿಯದೇ ಪೆಚ್ಚು ಮೋರೆ ಹಾಕಿ ಕುಳಿತ ನನ್ನ ಬಳಿಗೆ ಹಿಂದಿನಿಂದ ಯಾವುದೋ ಹೆಣ್ಣು ಹೆಜ್ಜೆಗಳು ನಡೆದು ಬಂದಂತಾಯಿತು. ನನ್ನ ಕೆಂಪಾಗಿದ್ದ ಮುಖವನ್ನು ಎತ್ತಿ ನೋಡಿದೆ. ಹೊಳಪಿನ ಕಣ್ಣುಗಳ ನಳಿನಿ ನಗೆ ಬೀರುತ್ತ ಬಂದು ಪಕ್ಕದಲ್ಲಿ ನಿಂತಿದ್ದಳು. ನಾನು ನನ್ನ ಕಂಪ್ಯೂಟರ್ ಪರದೆಯ ಕಡೆ ನೋಡಿ ನನಗೇನೂ ಗೊತ್ತಿಲ್ಲ ಎಂಬಂತೆ ಕೈ ತಿರುವಿದೆ. ವಿಷಯ ಅರಿತ ಅವಳು ಕರುಣಾಮಯಿ ಮದರ್ ತೆರೆಸಾ ಥರ ಲುಕ್ ಕೊಟ್ಟು "ಕಂಟ್ರೋಲ್ ಬ್ರೇಕ್" ಒತ್ತಿ ಎಂದಳು. ನಾನು ಕೀಬೋರ್ಡಿನ ಮೇಲೆ ಕಣ್ಣಾಡಿಸಿದೆ. ಮೂಲೆಯಲ್ಲಿ ಬ್ರೇಕ್ ಕೀ ಕಾಣಿಸಿತು. ತಕ್ಷಣವೇ ಇಲಿ ಹಿಡಿದ ಬೆಕ್ಕಿನಂತೆ ಅದನ್ನು ಹಿಡಿದುಕೊಂಡೆ. ನಂತರ ಕಂಟ್ರೋಲ್ ಕೀಗಾಗಿ ಹುಡುಕಾಡಿದೆ. ಒಂದು ಬಾರಿ.. ಎರಡು ಬಾರಿ.. ಮೂರು ಬಾರಿ... ಕಣ್ಣಾಡಿಸಿದೆ. ಊಂ ಹೂಂ ಸಿಗಲೇ ಇಲ್ಲ. ಹಳೆಯ ಕೀಬೋರ್ಡಾದ್ದರಿಂದ ಕೀಗಳ ಮೇಲಿನ ಅಕ್ಷರಗಳೆಲ್ಲ ಅಳಿಸಿ ಹೋಗಿದ್ದವು! ಬೈದುಕೊಳ್ಳುತ್ತಾ ನಳಿನಿಗೆ ಏನೋ ಹೇಳಲು ಹೋದೆ ಅಂಜಿಕೆಗೆ ಒಣಗಿದ್ದ ನಾಲಿಗೆ ತೊದಲಿತು... "ಕಂಟ್ರೋಲ್ ಸಿಗ್ತಿಲ್ಲ" ಎಂದೆ. ಅವಳು ಕಿಸಕ್ಕನೆ ನಕ್ಕು ಬಿಟ್ಟಳು. ಒಂದು ಕ್ಷಣ ಹೃದಯ ಬಡಿತ ಹೆಚ್ಚಾಯಿತು. ಅಬ್ಬ ಎಂಥ ನಗು! ಅದು ನಗುವೋ ಇಲ್ಲ ಮಾಯಾಜಲವೋ ತಿಳಿಯಲಿಲ್ಲ. ನೆಲದ ಮೇಲೆ ಮುತ್ತುಗಳೇನಾದರೂ ಉದುರಿವೆಯೇ ಎಂದು ಕೆಳಗೆ ನೋಡಬೇಕೆನಿಸಿದರೂ ಅವಳ ಸುಂದರ ನಗುಮುಖದಿಂದ ಕಣ್ತೆರೆಯಲು ಸಾಧ್ಯವಾಗಲಿಲ್ಲ! ಬ್ರೇಕ್ ಕೀ ಮೇಲಿಟ್ಟಿದ್ದ ಕೈ ಇನ್ನೂ ಅಲ್ಲಿಯೇ ಇದೆ! ನಾನು ಮಾತ್ರ ಎಚ್ಚರ ತಪ್ಪಿದ್ದೆ! ಅವಳಿಗೂ ಅದರ ಅರಿವಾಗಿತ್ತು. ತಾನಾಗಿಯೇ ಕಂಟ್ರೋಲ್ ಕೀ ಒತ್ತಿ ನಗು ತಡೆಯಲಾಗದೆ ಹೊರಟುಹೋದಳು. ತಕ್ಷಣ ಪರದೆಯ ಮೇಲೆ ಹರಿದಾಡುತ್ತಿದ್ದ ಅಕ್ಷರಗಳು ಮಾಯವಾದವು. ಕಂಪ್ಯೂಟರ್ ಸರಿ ಹೋಗಿತ್ತು. ಆದರೆ ಈಗ ಹ್ಯಾಂಗ್ ಆಗುವ ಖಾಯಿಲೆಗೆ ನನ್ನ ಮನಸ್ಸು ತಾನಾಗೇ ಶರಣಾಗಿತ್ತು! ಹೃದಯದಲೆಲ್ಲಾ ಏನೇನೋ ಹರಿದಾಡುತ್ತಿರುವಂತೆ ಭಾಸವಾಗುತಿತ್ತು. ಅವಳು ಹೋದ ದಿಕ್ಕಿನಲ್ಲೇ ಇನ್ನು ನೋಡುತ್ತಾ ಕುಳಿತಿದ್ದೆ.
         ಹಿಂದಿನಿಂದ ಯಾರೋ ಬೆನ್ನು ತಟ್ಟಿ ನನ್ನ ಇಹಲೋಕಕ್ಕೆ ಕರೆತಂದರು. ತಿರುಗಿ ನೋಡಿದರೆ ಎದುರಿಗೆ ನಮ್ಮ ಸಿ ಅಧ್ಯಾಪಕಿ ಸಿಟ್ಟಿನಿಂದ ನನ್ನೆದುರು ನಿಂತು ಉತ್ತರಪತ್ರಿಕೆ ಕೇಳುತ್ತಿದ್ದರು. ಅವರ ಕೈಯಲ್ಲಿದ್ದ ಇತರರ ಉತ್ತರ ಪತ್ರಿಕೆಯಲ್ಲಿ ದೊಡ್ಡ ದೊಡ್ಡ ಸಿ ಪ್ರೋಗ್ರಾಮ್‍ಗಳು ರಾರಾಜಿಸುತ್ತಿತ್ತು. ನನ್ನ ಉತ್ತರಪತ್ರಿಕೆಯಲ್ಲಿ ಮಾತ್ರ ಈ ಚಿತ್ರಕಲೆ! 
 
ಏನು ಮಾಡುವುದೋ ತೋಚದೆ ಒಂದು ನಿಮಿಷ ಸಮಯ ಕೇಳಿದೆ. ಅವರು ಸರಿಯೆಂದು ಮುಂದಿನ ಸಾಲಿನವರತ್ತ ಹೋದರು. ನಾನು ತಕ್ಷಣ ಆ ಚಿತ್ರದ ಪಕ್ಕವೇ ಕ್ಷಮೆಯಾಚಿಸಿ ಪ್ರಾಸದಲ್ಲೇ ಎರಡು ಸಾಲು ಬರೆದೆ -

ಕ್ಷ - ಮಿ -  ಸಿ
I dont know - C

ಅದರ ಮೇಲೊಂದು ಹಾಳೆ ಮುಚ್ಚಿ ಅವರ ಕೈಗಿಟ್ಟು ಹೊರ ಬಂದೆ. ಹೊರ ನಡೆದಾಗ ನನ್ನ ಹೆಜ್ಜೆಗಳು ಏಕೋ ಹಗುರವಾಗಿದ್ದವು. ಬೀಸುತ್ತಿದ್ದ ತಂಪಾದ ಗಾಳಿಯಲ್ಲಿ ಮನಸ್ಸು ತೇಲುತ್ತಿತ್ತು. ಆಂದು ಕಂಪ್ಯೂಟರಿನ ಕಂಟ್ರೋಲ್ ಕೀ ಸಿಕ್ಕಿತಾದರೂ ನನ್ನ ಹೃದಯದ ಕಂಟ್ರೋಲ್ ಕೀ ಕಳೆದುಹೋಗಿತ್ತು! ಹುಡುಕಿಕೊಡಲು ಮತ್ತೆ ನಳಿನಿ ಬರಬಾರದೇ ಎನಿಸುತಿತ್ತು!

ಕ್ಲೈಮ್ಯಾಕ್ಸ್: ಕಾಲೇಜಿನ ಕೊನೆಯ ದಿನಗಳು.. ನಳಿನಿ ಅಂತೂ ಸಿಗಲಿಲ್ಲ... ಆದರೆ ನಾನು ಸಿ ಭಾಷೆಯಲ್ಲಿ ಪರಿಣಿತನಾಗಿ ಅದರಲ್ಲೇ ಕಂಪ್ಯೂಟರ್ ಗೇಮ್ ಒಂದನ್ನು ಬರೆದಿದ್ದೆ. ಮೊದಲ ಪರೀಕ್ಷೆಯಲ್ಲಿ ನನ್ನ ಚಿತ್ರ ಕವನ ನೋಡಿ ಇವನಲ್ಲಿ ಪ್ರತಿಭೆಯಿದೆ ಎಂದು ನಂಬಿ ಪಾಸು ಮಾಡಿಸಿದ್ದ ಕರುಣಾಮಯಿ ಅಧ್ಯಾಪಕಿ ಆ ದಿನ ನೋಡಲು ನಮ್ಮೊಂದಿಗಿರಲಿಲ್ಲ.




Thursday, November 6, 2014

Technical ಲವ್


ಬಹುರಾಷ್ಟ್ರೀಯ ಕಂಪನಿಯಲ್ಲಿ ನೆಟ್‍ವರ್ಕ್ ಇಂಜಿನಿಯರ್ ಆಗಿರುವ ನನಗೆ ಪ್ರತಿನಿತ್ಯ ಚಿತ್ರವಿಚಿತ್ರ ರೀತಿಯ ತಾಂತ್ರಿಕ ತೊಂದರೆಗಳ ಬಗ್ಗೆ ಪ್ರಪಂಚದ ಎಲ್ಲಾ ಮೂಲೆಗಳಿಂದ ಈಮೇಲ್‍ಗಳು ಬರುತ್ತಿರುತ್ತವೆ. ಆ ತಾಂತ್ರಿಕ ದೋಷಗಳಿಗೆಲ್ಲಾ ಪರಿಹಾರ ಸೂಚಿಸುವುದೇ ನಮ್ಮ ಕೆಲಸ. ಕೆಲವೊಮ್ಮೆ ನಮ್ಮ ಜವಾಬ್ದಾರಿಯ ಪರಿಧಿಯಿಂದ ಹೊರತಾದ ಸಮಸ್ಯೆಗಳ ಬಗ್ಗೆಯೂ ಸಲಹೆಗಳನ್ನು ಕೋರಿ ಹಲವರು ಈಮೇಲ್ ಕಳುಹಿಸುತ್ತಿರುತ್ತಾರೆ. ಅಂತಹ ಸಮಯದಲ್ಲಿ ನಯವಾಗಿ ಇದು ನಮಗೆ ಸಂಬಂಧಪಟ್ಟಿದ್ದಲ್ಲ. ದಯವಿಟ್ಟು ನೀವು ಇಂಥವರನ್ನು ಸಂಪರ್ಕಿಸಿ ಎಂದು ಅವರ ಕೋರಿಕೆಗನುಸಾರವಾಗಿ  redirect ಮಾಡಬೇಕಾಗುತ್ತದೆ. 2011ರ ಜಪಾನಿನ ಪ್ರಳಯ ಸದೃಶ ಸ್ಥಿತಿಯಲ್ಲಿ "ನಮ್ಮನ್ನು ರಕ್ಷಿಸಿ" ಎಂದು ಬಂದಂಥ ಹೃದಯ ವಿದ್ರಾವಕ ಕರೆ ಇಂದ ಹಿಡಿದು "ಸರ್ವರ್ ರೂಮಿನಲ್ಲಿ ಬೆಕ್ಕಿನ ಮರಿ ಸಿಕ್ಕಿಹಾಕಿಕೊಂಡಿದೆ. ತಾತ್ಕಾಲಿಕವಾಗಿ ಅದಕ್ಕೇ ಅಲ್ಲೇ ಏನಾದರೂ ಆಹಾರದ ವ್ಯವಸ್ಥೆ ಮಾಡಿ" ಎಂಬ ಹಾಸ್ಯಾಸ್ಪದ ಈಮೇಲ್‍ಗಳನ್ನು ನನ್ನ  Inboxನಲ್ಲಿ ಕಾಣಬಹುದು. ನೆನ್ನೆ ದಿನ ಇಂತಹುದೇ ಒಂದು ವಿಚಿತ್ರ ಈಮೇಲ್ ನನ್ನ ಇನ್‍ಬಾಕ್ಸಿಗೆ ಬಂದು ಬಿತ್ತು. ತೆಗೆದುನೊಡಿದರೆ ಅದರಲ್ಲಿ ಬರೆದಿತ್ತು...

"LOVER NOT RESPONDING. PLEASE HELP!!!"

Loverboy ಥರ ಫೋಸ್ ಕೊಡುತ್ತಿದ್ದ ದಿನಗಳು, ಲವ್‍ಗುರು ಆಗಿ ಗೆಳೆಯರ ಪ್ರೇಮ ಪ್ರಸಂಗಗಳು ಕುದುರುವಂಥ ಸಲಹೆಗಳನ್ನು ನೀಡುತ್ತಿದ್ದ ವೈಭವದ ಕಾಲೇಜು ದಿನಗಳು ಮುಗಿದು ವರ್ಷಗಳೇ ಕಳೆದಿವೆ. ಆದರೆ ಇವರು ಯಾರೋ ನನ್ನ ಅಂದಿನ ಸಾಮರ್ಥ್ಯವನ್ನು ಅರಿತು ಈಗ ಸಂದೇಶ ಕಳುಹಿಸುತ್ತಿದ್ದಾರಲ್ಲ ಎಂದು ಅಚ್ಚರಿಪಟ್ಟೆ. ಎಲ್ಲೋ ಏನೋ ಮಿಸ್ ಹೊಡೀತಾ ಇದೆ ಅಂತ ಅಂದುಕೊಂಡೆ. ಕೂಲಂಕುಶವಾಗಿ ಮೇಲ್‍ಅನ್ನು ಪರಿಶೀಲಿಸಿದಾಗ ವಿಷಯ ಅರ್ಥವಾಯಿತು. ನಗುವೂ ಬಂದಿತು. ತಕ್ಷಣ ಮೇಲ್ ಕಳುಹಿಸಿದ್ದ ನನ್ನ ಆಪ್ತಗೆಳೆಯ ಸಹೋದ್ಯೋಗಿ ನವೀನ್‍ಗೆ ಕರೆ ಮಾಡಿದೆ.

"ಗರ್ಲ್‍ಫ್ರೆಂಡ್ ಜೊತೆ ಜಗಳ ಆಡಿದ್ದೀಯ?" ವಿಚಾರಿಸಿದೆ

"ಈಗ್ಯಾಕೋ ಅವೆಲ್ಲ.. ನಮ್ದು ದಿನಾಗಲೂ ಜಗಳ ಇದ್ದಿದ್ದೇ" ಎಂದ

"ಏನಾಯ್ತು ಅಂತ ಸ್ವಲ್ಪಬಿಡಿಸಿ ಹೇಳೋ" ಎಂದೆ

"ನೆನ್ನೆ ನಾನೇನೋ ತಪ್ಪು ಮಾತಂದೆ. ಅದಕ್ಕವಳು ಮುನಿಸಿಕೊಂಡು ಫೋನ್ ಸ್ವಿಚ್‍ಆಫ಼್ ಮಾಡಿದ್ದಾಳೆ ಕಣೋ" ಅಂದ

"ಹೂಂ. ಸರಿ ಒಂದು ಕೆಲಸ ಮಾಡು ನಿನಗೆ ನಿನ್ನವಳ ಗೆಳತಿಯರು ಪರಿಚಯವಿರಬೇಕಲ್ಲವೆ? ಅವರಿಗೆ ಕರೆ ಮಾಡಿ ಅವಳ ಮನಸ್ಸನ್ನು reboot ಮಾಡೋಕೆ ಹೇಳು. ಎಲ್ಲಾ ಸರಿ ಹೋಗುತ್ತೆ" ಎಂದೆ.

ಆತ ಸ್ವಲ್ಪ ಸಿಟ್ಟಿನಲ್ಲೇ "ಆಯ್ತಪ್ಪ ಪುಣ್ಯಾತ್ಮ ಲವ್ ಟೆಕ್ನಿಶಿಯನ್ ನೀನು... ಸರ್ವರ್ ರಿಪೇರಿ ಮಾಡು ಅಂದ್ರೆ ಲವರ್‌ನೇ ರಿಪೇರಿ ಮಾಡಿಸೋ ಸಲಹೆ ಕೊಡ್ತೀಯ!" ಎಂದ

ನಾನು ಉತ್ತರಿಸಿದೆ "ಏನು ಮಾಡೋದು ಸ್ವಾಮಿ ಜನ ಯಾವುದೇ ತೊಂದರೆ ಬಗ್ಗೆ ಮೇಲ್ ಬರೆದರೂ ಉತ್ತರ ನೀಡಬೇಕದದ್ದು ನಮ್ಮ ಕರ್ತವ್ಯ. ನಿಮ್ಮಂಥ ಪ್ರೇಮಾಂಧರಿಗೆ ಸರ್ವರ್‌ಗೂ ಲವರ್‌ಗೂ ವ್ಯತ್ಯಾಸನೇ ಗೊತ್ತಾಗಲ್ಲ ಅನ್ಸುತ್ತೆ ಈ ನಡುವೆ" ಎಂದೆ.

ಅವನು ತಬ್ಬಿಬ್ಬಾಗಿ ತನ್ನ  Sent items ಚೆಕ್ ಮಾಡಿದ. ಆಗಲೇ ಎಲ್ಲಿ ತಪ್ಪಗಿದೆ ಎಂದು ಅವನಿಗೆ ತಿಳಿದದ್ದು. ವಿಷಯ ತಿಳಿದು ಇಬ್ಬರೂ ಬಿದ್ದು ಬಿದ್ದು ನಕ್ಕೆವು.

ನಮ್ಮ ಕಂಪನಿಯಲ್ಲಿ ಸರ್ವರ್‌ಗಳಿಗೆ ಹೀಗೆ ಹೆಸರಿಡುವ ಪದ್ಧತಿ ಇದೆ.. ಬೆಂಗಳೂರಿನಲ್ಲಿರುವ ಸರ್ವರ್‌ಗೆ  BGSERVER  ನ್ಯೂಯಾರ್ಕ್‍ನಲ್ಲಿರುವ ಸರ್ವರ್‌ಗೆ  NYSERVER  ಹಾಗೆ ಲಂಡನ್‍ನಲ್ಲಿರುವ ಸರ್ವರ್‌ಗೆ  LOSERVER  ಎಂದು ಹೆಸರು!  "LOSERVER NOT RESPONDING. PLEASE HELP"  ಎಂದು ಟೈಪ್ ಮಾಡಬೇಕಿದ್ದ ಕಡೆ ಕೆಲವು ಅಕ್ಷರಗಳು ಮಾಯವಾಗಿ ಅದು  "LOVER NOT RESPONDING"  ಆಗಿತ್ತು.

"ಸರಿ ಮಾರಾಯ ಈಗ ಸರ್ವರ್ ಪ್ರಬ್ಲಮ್ ಗೆ ಏನು ಮಾಡೋದು ಹೇಳು" ಅಂದ.

"ನೋಡು ಗೆಳೆಯ ಈ ಸರ್ವರ್ ಕೂಡ ಒಂಥರಾ ನಿನ್ ಲವರ್ ಇದ್ದಂಗೆ. ನಾನು ಹೇಳಿದ Logic ಅನ್ನೇ ಅಲ್ಲೂ ಬಳಸು ಸರಿ ಹೋಗುತ್ತೆ" ಎಂದೆ

"ಹೀಗೆ ಒಗಟೊಗಟಾಗಿ ಮಾತಾಡಬೇಡ್ವೋ.. ನೆನ್ನೆ ಇಂದ ಕೆಲಸಗಳಾಗಿಲ್ಲ..." ಅವ ಗೋಗರೆದ.

"ನೋಡೋ ಈ ಸರ್ವರ್ ಕೂಡ ಒಂಥರಾ ನಿನ್ ಲವರ್ ಇದ್ದಂಗೆ. ಅವಳು ನೆನ್ನೆ ನೀನಾಡಿದ್ದ ಮಾತನ್ನು ತಪ್ಪಾಗಿ ಗ್ರಹಿಸಿ ಮುನಿದು ಫೋನ್ ಸ್ವಿಚಾಫ್ ಮಾಡಿದ್ದಾಳೆ. ಸರ್ವರ್ ಕೂಡ ನೆನ್ನೆ ನೀನು ಹೊಡೆದ  password  ತಪ್ಪಾಗಿದ್ದಿದ್ದರಿಂದ ಮುನಿದು ನಿನ್ನ  account deactivate ಮಾಡಿದೆ. ನಾನಂದೆ ನೀನು ಅವಳ ಗೆಳೆತಿಯರ ಕೈಲಿ ಅವಳ ಮನ ಓಲೈಸು. ಇಲ್ಲೂ ಅಷ್ಟೆ ಸರ್ವರ್ ಸ್ನೇಹಿತರು ಅಂದರೆ ಸರ್ವರ್ ಅಡ್ಮಿನ್‍ಗಳಿಗೆ ಕರೆ ಮಾಡಿ ನಿನ್ನ  Account reactivate ಮಾಡಿಸು. ಆಗ ನಿನ್ನ ಎರಡೂ ತೊಂದರೆಗಳೂ ನಿವಾರಣೆಯಾಗುತ್ತವೆ" ಎಂದೆ. ಆತ ಸಂತೃಪ್ತನಾಗಿ ಧನ್ಯವಾದ ಹೇಳಿ ಫೋನಿಟ್ಟ.

ತಂತ್ರಙ್ಞಾನದ ಹಲವು ವಿಷಯಗಳನ್ನು ಜೀವನದ ಕೆಲವು ಅಂಶಗಳಿಗೆ ತರ್ಜುಮೆ ಮಾಡಿ ಹೇಳುವುದು ನನಗೆ ಬಹಳ ಹಿಂದಿನಿಂದ ಬಂದ ಅಭ್ಯಾಸ. ಅಲ್ಲಿನ ಸಿದ್ಧಾಂತಗಳಿಗೂ ಇಲ್ಲಿನ ಸಂದರ್ಭಗಳಿಗೂ ಬಹಳಷ್ಟು ಸಾಮ್ಯತೆ ಇದೆ. ಈಗ ನೋಡಿ ಈ desktop computer ಎಂಬುದಿದೆಯಲ್ಲ ಅದೊಂಥರ ಹಿಂದಿನ ಕಾಲದ ಮಧ್ಯಮವರ್ಗದ ಗೃಹಿಣಿ ಇದ್ದ ಹಾಗೆ. ಅದೆಷ್ಟೇ ಸಮರ್ಥವಾಗಿ ಕೆಲಸ ಮಾಡಿದರೂ ಯಜಮಾನನಿಗೆ ಅದರ ಹೆಸರೆತ್ತಿದ ಕೂಡಲೇ ಅದರ ಗಜಗಾತ್ರದ,  glamourless looks ಕಣ್ಣಿಗೆ ಕುಕ್ಕುತ್ತದೆ. ಮನೆ ಹೆಂಗಸರಿಗಿರುವಂತೆ desktopಗೆ mouse, keyboard, modemಗಳ ಪಾರಂಪರಿಕ ಬಂಧನ, ಕಟ್ಟುಪಾಡುಗಳು. ಅವಳನ್ನು ಹೊರಗೊಯ್ಯಲು ಯಜಮಾನ ಯೋಚಿಸುತ್ತಾನೆ ಖರ್ಚಾಗುತ್ತದೆಂದು. ಆದರೆ ಈ ಮೊಬೈಲ್ ಇದೆಯಲ್ಲ ಅದು ಒಂಥರಾ glamorous girlfriend ಇದ್ದ ಹಾಗೆ. ಹೊರ ಹೋದಾಗಲೆಲ್ಲಾ ಅದರೊಡೆಯ ಜಾಲಿಯಾಗಿ ಕೈ ಹಿಡಿದು ಕರೆದುಕೊಂಡು ಹೋಗುತ್ತಾನೆ. ಅವಳೊಂದು ಚೂರು ಗೋಳಾಡಿದರೂ ತಕ್ಷಣ chargingಗೆ ಹಾಕಿ ಆರೈಕೆ ಮಾಡುತ್ತಾನೆ. ಅವಳು ಕೇಳದಿದ್ದರೂ "ಖರ್ಚಿಗೆ ಬೇಕಾಗುತ್ತೆ ಇಟ್ಕೋ ಚಿನ್ನ" ಎಂದು ಕರೆನ್ಸಿ ಹಾಕಿಸುತ್ತಾನೆ. ಕವರ್ ಹೊದ್ದಿಸಿ ಬೆಚ್ಚಗೆ ಜೋಪಾನ ಮಾಡುತ್ತಾನೆ ಆದರೆ ಪಾಪ desktopಗೆ ಮಾತ್ರ ಕೆಲಸವಿದ್ದಾಗಷ್ಟೆ ಕರೆಂಟು ಕೊಡುವುದು!

ಮೊಬೈಲ್ latest ಆಗಿದ್ದಷ್ಟು, stylish ಆಗಿದ್ದಷ್ಟು ಕೈ ಹಿಡಿದವ enjoy ಮಾಡುತ್ತಾನೆ. ಅಕ್ಕಪಕ್ಕದವರು ಇಂಥ ಮಾಡೆಲ್ ತಮಗೆ ಸಿಗಲಿಲ್ಲವಲ್ಲ ಎಂದು ಕೈ ಹಿಸುಕಿಕೊಳ್ಳುತ್ತಾರೆ. ದೊಡ್ಡ ಜೇಬಿರುವವರು ದೊಡ್ಡ ದೊಡ್ಡ "Touching" ಸೌಲಭ್ಯವಿರುವ "ಮಾಡೆಲ್"‍ಗಳನ್ನು ತಮ್ಮದಾಗಿಕೊಳ್ಳುತ್ತಾರೆ. ಅಂಥ ಅದೃಷ್ಟವಂತರು ಒಮ್ಮೆ ಸವರಿದರೆ ಸಾಕು ಅವಳ ಮನಸ್ಸು ಮೊಬೈಲ್ ಸ್ಕ್ರೀನ್‍ನಂತೆ unlock ಆಗಿಬಿಡುತ್ತೆ. ಹೊಸತರಲ್ಲಂತೂ ಅವಳ ಪ್ರತಿಯೊಂದು ಭಾವವೂ ಹೊಸದಾಗಿ ಡೌನ್‍ಲೋಡ್ ಮಾಡಿದ Free appನಂತೆ ಮುದ ನೀಡುತ್ತವೆ.

ಇನ್ನು ಈ ಸಿ.ಡಿ.ಗಳಿವೆಯಲ್ಲ ಅದಂತೂ desktopಗೆ ಹೆರಿಗೆಯಾದಂತೆ! ಮನೆ ಮಡದಿಯು ತುಂಬು ಗರ್ಭಿಣಿಯಾದಾಗ ಹುಟ್ಟುವ ಮಕ್ಕಳಂತೆ ಇವು desktopನ harddisk ತುಂಬಿದಾಗ CD drive ಗರ್ಭದಿಂದ ಅಚ್ಚಾಗಿ ಮಕ್ಕಳಂತೆ ಹೊರಬರುತ್ತವೆ. ಮುಂಚೆಯೆಲ್ಲಾ ಮನೆ ತುಂಬುವಷ್ಟು ಮಾಡಿಕೊಳ್ಳುತ್ತಿದ್ದರು. ಈಗ ಒಂದೇ ಸಾಕು ಎನ್ನುತ್ತಾರೆ (USB!!) ಅವೂ ಹೆಚ್ಚಾದಷ್ಟು ಖರ್ಚು ನಿರ್ವಹಣೆಯ ಹೊರೆ ಜಾಸ್ತಿ. ಆದ್ದರಿಂದಲೇ ಅಚಾತರ್ಯದಿಂದ ಮಕ್ಕಳಾಗುವುದನ್ನು (ಸಿ.ಡಿ.) ತಪ್ಪಿಸಲು ಈ ಗುಳಿಗೆ ಎಲ್ಲಿಗೆ ಹೋದರೂ ಜೊತೆಯಲ್ಲೇ ಇರಲಿ..  Pendrive  ಮಾರಾಯ್ರೇ ನೀವೇನಂದುಕೊಂಡ್ರಿ??