ರಾಜಕೀಯದ ಎಳ್ಳು

ರಾಜಕೀಯದ ಎಳ್ಳು

ಮತ ಕೇಳಲು ಮಾತ್ರ ಬರುತಿದ್ದ ರಾಜಕಾರಿಣಿಗಳು
ಮನೆ ಬಾಗಿಲಿಗೆ ಬಂದಿಹರು ಇಂದು, ಬೀರಲೆಂದೇ ಎಳ್ಳು
ರಾರಾಜಿಸುತಿಹುದು ಪ್ರತಿ ಎಳ್ಳು ಪೊಟ್ಟಣದ ಮೇಲೂ
ಅವರದೇ ಹೆಸರು, ಚಿತ್ರ ಹಾಗು ಕೈ-ಕಮಲಗಳು,

ಹಿರಿಯರು ಅಂದು ಎಂದರು
ಎಳ್ಳು-ಬೆಲ್ಲ ತಿಂದು ಒಳ್ಳೆಯ ಮಾತನಾಡು
ಇವರು ಇಂದು ಹೇಳುವರು
ನಾವ್ ಕೊಟ್ಟ ಎಳ್ಳು ತಿಂದು ನಮಗೇ ಓಟು ಮಾಡು
ಯಾರೋ ಕೇಳಿದ ಅದಕೆ ಕೊಟ್ಟರೆ ಸಾಕೆ ಎಳ್ಳು-ಬೆಲ್ಲ?
"ಹಬ್ಬದ ದಿನನಾದ್ರು ಸ್ವಲ್ಪ ತಡ್ಕಳಪ್ಪಾ..
ಚುನಾವಣೆ ಬರಲಿ ಕೊಡುವೆ ನೋಟು, ಬಿರಿಯಾನಿ, ಬಾಟ್ಲಿಯೆಲ್ಲಾ!"

ಬಂದಿದೆಯೆಂದು ಮತ್ತೆ ಮಕರ ಸಂಕ್ರಾಂತಿ
ಬೇಡಿಕೊಳ್ಳುತಿಹರು ದೇವರಿಗೆ ಪಕ್ಷದಲ್ಲಿ ಶಾಂತಿ
ದಿನವೂ ಹೀಗೆ ಬಾಯಾಗುತಿರಲಿ ಸಿಹಿ
ಕೋಟಿ ಕೋಟಿ ಬರುತಿರಲಿ ನಾವ್ ಮಾಡಲು ಒಂದು ಸಹಿ
ಹೋಳಿಗೆಯೊಳಗೆ ಹೂತು ಹೋದಂತೆ ಹೂರಣ
ಮುಚ್ಚಿಹೋಗಲಿ ನಾವ್ ಮಾಡಿದ್ದ ಎಲ್ಲಾ ಹಗರಣ
ಮನೆಯ ಮುಂದೆ ಹೊಳೆಯುತಿರಲು ಎಳೆ ಮಾವಿನ ತೋರಣ
ಲೋಕಾಯುಕ್ತರು ದಾಳಿ ನಡೆಸಿ ಕೇಳದಿರಲಿ
ಲಕ್ಷ-ಲಕ್ಷದ ಲೆಕ್ಕಾಚಾರದಲ್ಲಾದ ಲೋಪಕೆ ಕಾರಣ
ಸಿಗುತಿರಲಿ ಬಿಟ್ಟಿಯಾಗಿ ಬೆಂಗಳೂರಲ್ಲಿ ಭೂಮಿ
ತೆಪ್ಪಗೆ ಕುಳಿತಿರಲಿ ನಾವ್ ಏನೇ ಮಾಡಿದರೂ ನೋಡುತ್ತ
ಸದ್ದಿಲ್ಲದೆ ಸನ್ಮಾನ್ಯ ಕುಮಾರಸ್ವಾಮಿ!